Messaggio
da Antonino » giovedì 18 dicembre 2008, 15:39
Novena di Natale
1°Giorno
Ascurtati, bona genti,
stu viaggiu dulurusu
tra lu friddu , affanna e stenti
di Maria cu lu so spusu.
San Giuseppi era cunfusu
pi la via c’avia a fari
nni lu miernu rigurusu
tra la nivi a viaggiari.
Bettelemmi, stu passaggiu,
l’artu Diu cci lu disponi:
si partieru ccu coraggiu,
l’artu Diu cci lu disponi:
si partieru ccu coraggiu
cu na pia divuzioni.
2°Giorno
San Giuseppi cunsulatu
un havi cchiu malincunia
pi la gioia ca è accumpagnatu
di la so spusa Maria
cu modesta ed allegria,
riverennu , umiliatu
larringrazia ad a Maria
ch’ogni pena cci ha livatu.
Pi lu partu c’havi a fari
Maria ancora èaffannateddra:
si disponi di pigliari
ch’avia du nfasciatureddra.
3°Giorno
Di partiri già è disposta
Maria santa, spusa pura.
San Giuseppi già s’accosta
pi sirbiri la Signura.
Senza fari cchiu addimura
già su pronti a lu viaggiu.
San Giuseppi penza allura
di Maria lu gran disaggiu.
E Maria nun dici nenti,
cu Diu sulu sta fidata,
nun cunfida cu la genti
a Diu sulu sta appuiata.
4°Giorno
Unni sunnu confidati
li du santi amati spusi,
benché sunnu apparicchiati
a partiri su cunfusi.
Benché sunnu timurusi,
San Giuseppe cu Maria
caminannu graziusi
cuminciaru già la via.
Oh ! Chi focu s’accinnia!
oh chi gran divuziuni!
Lu viaggiu di Maria
fu continua orazioni.
5°Giorno
Viaggiava la Signura
tutta umili e modesta
ca paria na criatura
santa, casta, pura e onesta
cci facia na gran festa
cu pi via l’accumpagnava:
ammiratu ognunu resta
ch’ogni cori nnamurava.
Era tantu lu frivuri
di lu so cori nfucatu
c’accinnia focu d’amuri
ad ogni cori agghiazzatu.
6°Giorno
San Giuseppi cu Maria
sicutannu lu viaggiu;
suppurtaru pi la via
ogni pena, ogni disaggiu.
Lu so ancilu pi viaggiu
ca pi via l’accumpagnava,
sempri dannuci coraggiu
ma la pena un ci livava.
O divoti tribulati,
vui c’aviti patimenti
sti du spusi contemplati:
né cchiu chianti né lamenti.
7°Giorno
stanchi già di tanta via
mezzi morti su arrivati
San Giuseppi cu Maria
già traseru la citati.
Firriannu pi, li strati,
un avianu stanza avutu:
si scriveru, hannu pagatu
a lu re lu so tributu.
Oh chi cosa lagrimusa
quantu casi firriaru
San Giuseppi e la so spusa
nuddru alloggiu nun truvaru.
8°Giorno
San Giuseppi n tanti guai
fora stannu n mezzu via
e dicennu: cca starai
nchista notti, spusa mia.
Chi duluri e pena ria
sentu spartimi lu pettu
pi un truvari ncurtisia
quarchi pocu di rizzettu.
Apparicchiati, arma mia,
nni stott’avu iornu to,
pi lu partu di Maria
pi la nascita di Gesù.
9°Giorno
Chiddra notti principali
ca nascì l’onnipotenti
iornu parsi naturali
cu tri stiddri risplennenti.
Li cchiu spiriti potenti
di l’empiriu calaru
cuncirtaru li strumenti
e la gloria cantaru.
Quannu poi s’addurmintava
lu benignu Figliu so
Maria ninna cci cantava:
Dormi figliu e fa la ò.
Antonino